நீங்கள் தேடியது "ஹீனா சித்து"

ஜகார்த்தா:

இந்தோனேசியாவில் நடைபெற்று வரும் ஆசிய விளையாட்டுப் போட்டித் தொடரில் இன்று இந்திய வீரர்கள் தொடர்ந்து பதக்கங்களை குவித்து வருகின்றனர். குறிப்பாக துடுப்பு படகுப் போட்டி மற்றும் டென்னிஸ் போட்டியில் இந்தியாவுக்கு 2 தங்கப் பதக்கம் கிடைத்தது.

இந்நிலையில், மகளிருக்கான 10 மீட்டர் ஏர் பிஸ்டல் துப்பாக்கி சுடும் போட்டி நடைபெற்றது. தகுதிச்சுற்றில் இந்திய வீராங்கனைகள் மானுபாகர், ஹீனா சித்து ஆகியோர் பங்கேற்றனர். மானுபாகர் 574 புள்ளிகளுடன் 3-வது இடமும், ஹீனாசித்து 571 புள்ளிகளுடன் 7-வது இடமும் பிடித்து இறுதி சுற்றுக்கு தகுதி பெற்றனர்.

அதன்பின்னர் நடைபெற்ற இறுதிச்சுற்றில் ஹீனா சித்து 219.2 புள்ளிகளுடன் மூன்றாமிடத்தைப் பிடித்தார். இதனால் அவருக்கு வெண்கலப் பதக்கம் கிடைத்தது. மனு பாகர் 176.2 புள்ளிகளுடன் 5-வது இடத்திற்கு பின்தங்கி பதக்க வாய்ப்பை இழந்தார். இப்பிரிவில் சீனாவின் வாங் கியான் தங்கப்பதக்கமும், தென் கொரியாவின் கிம் மிஞ்சங் வெள்ளிப் பதக்கமும் வென்றனர்.

ஆண்களுக்கான 300 மீட்டர் ஸ்டாண்டர்ஸ் ரைபிள் இறுதிப்போட்டியில் இந்திய வீரர்கள் ஹர்ஜிந்தர்சிங் 560 புள்ளிகளுடன் 4-வது இடத்திலும், அமீத்குமார் 559 புள்ளிகளுடன் 5-வது இடமும் பிடித்து பதக்கத்தை தவறவிட்டனர்.

இப்போட்டியில் கொரியாவின் யங்ஜியன் (569) தங்கமும், சவுதி அரேபியா வீரர் அல்ஹர்பி (568) வெள்ளியும், கொரியாவின் லீ வாங்கு (563) வெண்கலமும் வென்றனர். #AsianGames2018 #HeenaSidhu